| |
OSHEKI AKANTA ATZIRIPAYE AÑANTARI PASHINI OKANTA
Akante avisake osheki osarentsipaye, anampitsite aseinkantari iroñaka ikovaveta apotoyetero aparoni nampitsi akantero. Iroka akovaveta aijatero añakero te okantaperote aseikinta jaka anampiki pashini okanta, akantero añasta ashaninkapaye.
Pashiniki nampitsi tzimatsi osheki atziri ashaninka okaratzi 40 millones atziripaye, akantero irotake tzimatsiri añavaiteri tsika ikantavaita irañantari inampiki iseinkinta, oyote ejatzita iñane maroiteni inampiki pashinipaye. Akante maaronipaye atziripaye ashaninka te okametsate ikanta irañantari isenkinkta, kantzimaincha aviakotakero tsika ikantavaita iseiky inampiki, iroka aririka ikovajete ivetsike irantantyari apatotanshi inkene iramenero tsika akantero ajevatantyari onkene ranite kametsaine anampi.
Iroka añaventeri iroñaka onatzi kametsarini añavaiteri <<anashta akanta aseiky anampiki>> ejatzita <<tsika ikantavaita irantajetziri>>, añaventeri asankenatakeri jenokinto, ayotakero tzimatsi osheki tsika okantavaita añantari anampiki, onashta oseikika jaka, pashininta añavaiteri, isankenate tsika okantavaita iranteri iseinkinta inampiki, iyometantantyari pashinipaye atziripaye ashaninka seikatsiri jaka anampiki aseikantari ejatzita nampitsiki.
Aseikinta tzimatsi osheki tsika okanta akinshiria irotake ajatantyari oyotanekite okanta aseikantari kametsa, ero amashirinkavaita otsimatye apinkatsateri paitarika avishimoteini. Iroka añavaiteri te nokantemi tsame ampiakoteri añane ejatzita te no kantemi piyate pimantyari pashini atziripaye, nokantavakemi nokovi papototajetya kametsaini piñavaite, aririka akisavakajia aritake akovake ero ameneri apata, tsame akinkithe paita avishimotai maaroni añantari tsika okantavaita anampiki, tsipaitaka antajetapintari aseikantari avankokipaye ejatzita tsipaita añavaitziri aririka akinkitsatakakeri pashini ashaninka, akonompitatye ayotaneki pashininta atziripaye, ari antakero iroka ari ayotakero tsika ikantavaita iseikinta ejatzita ashi aaka ari iyotakero, (amperi ayotane ejatzita ari impakay iyotane) ari anakai ayote osheki. Iroñaka, iroka jevatzirori jaka Nampitsi ashaninkapaye ejatzita ajevantyari otzimatye amitakotay tsika okantavaita añantari maaroni atziripaye ashaninka, irotake ajevantyari aretantyari tsipaite akoviri, amenantyari tsika akanteroka aye asankaneki kametsarini tzimatsiri anampikipaye, ayotatye apiteroite arentantyari jenoki okametsatata aseikiri anampiki, maaroni atziripaye seikatsiri antakeroki ejatzita jevatakantzirori anampitsite aseikantari; otzimantyari kinkitsariantzi kametsa, irotake aretantyari okametsate tsika akantavaita anampikipaye aseikinta iroñaka.
|
|
