IVORO ANTAVAITANTYARI

Jaka ipatsite aseikantakari, te amenero tsika akanteroka ajevantyari maaroni nampitsiki iseikantari ashaninkapaye ejatzita te iyometeiteri entsipaye añane. Akantero te avishe osheki osarentsi atziripaye amenironi tsika okanta ajevantyari kemitaka pashini atzipaye seikatsiri nampitsiki inteina ipakay capicheni iyotane, kantsimaincha te iramenero ipiakotakaro iyotane paisatzipaye tsika ikantavaita iseiki, irantavaitzi, ikanta ikenshiri ashaninkapaye ejatzita iñane; jaka anampitsite yometantsi ipiakotajetakero.

 Jaka anampitsite aseikantari kapichepathay evankari ashaninka jatatsiri  jayi iipatha yotamentzinkari, tzimatsi 14 ñavaitatsiri pashini ñantsi, seikatsiri Universidad Nacional Mayor de San Maros ikaratzi 118 evankaripaye, akantavaketa marroni evankaripaye kiatsiri iyotantyari te iyoperotero isankenate kametsa, te iriyote iñavaite, te ikametsaperoteri ikanta irañantari, te ikinshiri kametsaini te iñanavaite sankenarentsi, te raviakotero imatero iseikinta iyometantajetziri ejatzita te rameneiteri aririka imantsiyanake kantakantzirori te katsi irekite. Maaroni akantakeri iro kantzirori te iyoperote jaantakaro kityonkari te iravishe, te ikanta iseike kametsa iyometeiteri kantaperoitake, irotake irika evankari ikiantakari irasankaneki antaroite vashiretantsi te riaviakotero irotake itzimantari osheki evankaripaye te ithonkaperotero jatayetaka inampikipaye.

Iroka avisatsiri kariperori iseinkinta entsipaye, evankaripaye, te okametsaperote ipaitziro yotametantsi ankatero entantakaro ejatzita itsonkantakaro, te okametsate evankarokipaye iripaye ityankaitziro irantavaite nampitsiki, amavetakotantyarori ero otzimavaite entsitepaye, akantero ero omotyavaitantyari tsankini irotake ityankantarori. Te ikametsperoteri “Iyotane paisatzipaye  ajevatantyari ayotanekite” ero otzimantyari kariperori ñantsi ejatzita ovashiriavashta apaniroini ari oñake opashinitashtanakia tsika ikantavaita irañantari pashini atziripaye.

Otzimatye avakotero añathavaite aretantyari añavaite añane pashiniki aseiki atsipatari, maaroni atziripaye thonkataka ishintsinka; otampatzikatyeya apinkatsateri maaroni atziripaye. Maaroni ayotayetziri, seikacha añane, paitari ayotayetziri iyotane paisatzipaye, iroka tzimatsiri anampikipaye ayotaneki irotake avotsi okantyarori, amokaratantyari atziripaye ero iranakotantari, kemitaka atziri tzimatsiri iriketi, jevakantzirori anampitsite. Ejatzita, otzimatye amenero tsika akanteroka amitakoteri iyotantyari ari iyometeiteri amenatye atziri yotaniri ivetsikerita ipatsa ikametsaperoteka ero imasontantyari, iritake jevakantzirori anampitsitepaye aseinkinta.

Aviakotakero asankenatero Universidad Nacional de San Marcos atsipatakari Universidad Saskatchewan janta Canadá, ivetsikake aparoni sankenarentsi amitakotantyari evankaripaye pokatsiri inampipaye iyotantyari iñanate, isankenate, inkemeta yotametantsi, aririka ithonkakero ero imasontzitanake irika evankari ijatathe tsika ipokika ijevakantantyarori ejatzita aritake imatakero irantavaite tsikarika ikovajete pashini nampitsiki yotaniri.

Te ajevate kametsa  entanakaro, otzimatye amenero tzimatsi 5,818 nampitsi iseikantari ashaninkapaye, ari piñakero nosankenate iroka ñantsi ashaninka nokinshiriatziro ejatzita chori, aaka, aimara, pashini ero pikompitaro. Irita ameneroni avametsanteri piratsipaye, inchatopaye seikatsiri nampitsiki chori. Iroka choripaye iritake aminironi ashi iriroro ero ipiakotantajetero. Akantero tekatsi ameneroni amitakotajairi, tekatsi jevatakantzirori ejatzita amenantyarori.

Amenakero tsika okantavaita iseikantari choripaye inampiki  ikovi ijevate ishoke kametsaine ero ipiakotziro tsika ikantavainta irañantari paisatzipaye, iroka tzimavetacha ipatsite antaroite ejatzita tzimatsi piratsipaye, iroñaka entanakaro 2007, antavaitatzi amenatyariri ejatzita chori ipoketa iyoteta thame amitakoteri iyotantyari tsika ikanteroka ijevantyari inampikipaye, chori ejatzita ashaninka isankenatatye, ikinshiriatye otzimatye iyate amene paita kovatsiri inampikipaye, irika evankaripaye iyatantyari aritake apakeri kashetani kireki iranterota isankena, aritake itshonkakero iyatatye inampiki iramenero tsipaita iranteri otzimanthari ajevate.

Amenakeri iroñaka akovi amitakoteri evankaripaye iyotantyari kametsa itzimatye iyate iramenero ñantsi, isanmpite tsika ikantavaita irañantari paisatzipaye, iritake ameneroni tsika akanteroka avisatsiri anampikipaye, avamethantyari airekite jaka anampitsite aseikinta. Ejatzita, apakotatye shintsinka okamethatantyari tsika ikantavaita chori ejatzita ashaninkapaye, ero apiakotantyarori añane ejatzita akoyatye evankaripaye ñavaiperotziro iñane ejatzita sankenaperotziro iñane, antantyari sankenarentsi ayometantyariri atziri kovatsiri iyote ñantsipaye, avakotantyari kinshiriantzi añantyari, ampakoteri ayotane ojevantyari anampitsite ashaninka aseikantari.